Comme le piace ‘e se tené purposa,

a Carmelina, ‘a figlia ‘e donna Rosa.

Quanno cammina tutta se quartea

L’uommene ‘a guardano, essa se recrea.

 

Quanno se ferma, ‘mposta ‘o piette ‘nanze

se ‘mposta ‘mmiez’a via, senza crianza

‘nu giovane ‘a guarde e tira ‘nu suspiro:

“cademe ‘mbraccia oj né comm’a nu piro!”

 

‘Na sera camminava pe’ palazzine

facette sospirà pur’e’ spazzine:

“quanto si bella, Carmelina mia,

pe’ nu sorriso tujo, che faciarria.

 

P’avé ‘nu vaso a te, bella Carmela,

attraversarria ‘o mare senza vela

e po’ venesse ‘ncopp’addu ‘onna Rosa:

“Signò, Carmela vosta è la mia sposa!”

 

I’ ‘esse pur’America pe’ terra

a costo e fa venì ancora ‘na guerra;

e mentre cammenasse ‘ncopp’o mare

io cantarria: “Carmè ti voglio amare!”

 

Ma Carmelina a chesto nun ce penza

È ‘na guagliona e nun tene coscienza

Perciò quanno cammina se quartea,

si n’ommo ‘a guarda tanto se recrea!.